™®© ملك النور ©®™
مرحبا بك عزيزي الزائر. المرجوا منك أن تعرّف بنفسك و تدخل المنتدى معنا. إن لم يكن لديك حساب بعد, نتشرف بدعوتك لإنشائه
™®© ملك النور ©®™
مرحبا بك عزيزي الزائر. المرجوا منك أن تعرّف بنفسك و تدخل المنتدى معنا. إن لم يكن لديك حساب بعد, نتشرف بدعوتك لإنشائه
™®© ملك النور ©®™
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.




 
الرئيسيةشبكه شهد سورياأحدث الصورالتسجيلدخول

 

 يوم انصدمت بدنيتي... دورتك جنبي مالقيتك...(الجزء السابع)

اذهب الى الأسفل 
كاتب الموضوعرسالة
المستبدة
ღ♥ღالمشرف العام ღ♥ღ
ღ♥ღالمشرف العام ღ♥ღ
المستبدة


انثى
عدد الرسائل : 871
العمر : 34
السٌّمعَة : 0
التقيم : 17245
تاريخ التسجيل : 06/07/2008

يوم انصدمت بدنيتي... دورتك جنبي مالقيتك...(الجزء السابع) Empty
مُساهمةموضوع: يوم انصدمت بدنيتي... دورتك جنبي مالقيتك...(الجزء السابع)   يوم انصدمت بدنيتي... دورتك جنبي مالقيتك...(الجزء السابع) I_icon_minitimeالأربعاء يوليو 23, 2008 2:37 am

الجزء السابع
اليوم ملكة سلطان وفيض والكل مرتبش الا واحد ..عرفتوه؟؟ تركـــــــــــــــــــي اللي من يوم ما عرف انها انخطبت وهو في عالم ثاني تركي يحس بلوعة كلما تذكر شكلها وهي ميتة خوف على سلطان وهي ضامته بالمستشفى ..ايه تركي شافهم مع بعض لأنه كان رايح عشان يزورها وجايب لها جوري أحمر يعرف انها تموت في هالنوع من الورد بس وقف عند باب غرفتها وانتبه على أصوات استغرب بوجود رجال عندها وهي ماخذه راحتها وكان ناوي يدخل ويبعدها عنه بس تذكر تركي انه ماله حق انه يدخل ولا أي حق عشان يعصب وسكت بس من صدق انفجع يوم عرف انها انخطبت من نفس الرجال الغريب اللي شافه عندها سلطــــــــــــان..

**سلطان:لا لا ماني مسكر وحشتيني وما أبي أسكر لأن مايهون علي أسكر السماعة وانت عالخط
فيض:سلطاااااان الله يخليك الزم لازم أسكر وراي أشغال كثيرة
سلطان:طيب بأسكر بس بشرط
فيض:وشو؟
سلطان بصوت أطفال:أبي بوثة
فيض طلعت عيونها:وشو؟
سلطان:مارح أصك الثماعة الين ما تعتيني بوثة مو أي بوثة بوثة قوية
فيض استحت:سلطاااااان وش هالأسلوب ؟
سلطان بزعل:بتعطيني ولا لا؟
فيض تضحك على شخصيته الغريبة:ههههههههه خلاص بعدين يا بابا
سلطان:وعد؟
فيض عصبت:مين وعد؟من اليوم مافي الا فيض وبس
سلطان:حاضرين ياأم مشاعل
فيض ماتت من الحياء:سلطااااااااان
سلطان بهبل:مين سلطان؟؟أنا أبو مشاعل
فيض عصبت عليه مرة لانها تأخرت مرة عن أشغالها:طيب مع السلامة
سلطان:لحظة لحظة فيض
فيض:هلا
سلطان:أحبــــك

*قمر تأخرت عند الكوافيرة وكانت لابسة فستان أحمر ناعم عالجسم بدون أكتاف مع كعب ناعم وشعرها رافعته على فوق بحركة حلوة وكله كيرلي ونازلة منه خصل على وجهها ...
ونزلت بسرعة من سيارتها علشان تأخرت مرة على فيض على داسحب كلمتكها البيت ((بيت فيض))
اللي أكيد الحين ميتة من القهر على قمر صدمت بواحد وطاحت طرحتها وبغت تطيح بس يد الرجال مسكتها من ورى ظهرها وزلقت من جديد بالفستان ولصقت بصدر الرجال ويوم رفعت عينها شافته مفهي وفاتح فمه فيها استحت من الموقف البايخ ودخلت بسرعة لداخل البيت أما الرجال انتبه ان البنت اللي دخلت طاح منها جوالها شاله معاه وخذاه وطلع...

**كملوا البنات سهرتهم وقعدوا يستهبلون ويرقصون الا شوي صوت رجال:تغطوا يا حريم بيدخلون الرجال
وتغطوا البنات أو على الأقل الجزء اللي يتغطى وفيض ميتة من الخوف ..دخل سلطان مع أبوها وقف جنبها سلطان عشان يلبسها الشبكة<<أتوقع اسمها صح كذا
ويوم وقف سلطان جنبها بكل جراءة باس جبينها ويوم لبسها الخاتم رفع يدها وباس أصابعها أصبع أصبع أما فيض استحت من جرائته كيف تجرأ يسوي كذا قدام أبوها أما البنات ذايبين بجمال سلطان ورومانسيته وجرائته وقرب سلطان من أذن فيض وهمس لها : حياتي اليوم طالعة تجننين خفي علي شوي تراني ما أتحمل كذا ..
وبعد خمس دقايق طلع سلطان مع أبوها وقال أبو فيض لها:بعد نص ساعة روحي لسلطان بالمجلس وقرب منهاوقال وهو مو مصدق بنته الوحيدة تزوجت:والله يا فيض صرتي عروس وطلع

**وبعد نص ساعة راحت فيض لسلطان بالمجلس وهي في طريقها شافت تركي وراحت له
فيض:هلاوالله تركي غريبة ليه ما هنيتني؟
تركي""تبغين أهنيك بموتي؟؟"":مبروك يا فيض
فيض:معليش تركي لازم أروح لسلطان ..أكلمك بعدين مع السلامة
تركي قعد يناظرها وهي رايحه لسلطان ويصرخ صوت بداخله.....مع السلامة الله يهنيك معه يا حياتي ....رجع يصرخ صوت ثاني فيه.....خسرتها يا تركي خسرتها للأبد ...ويرجع الصوت يصرخ فيه من جديد ....تلعب على مين يا تركي على نفسك؟؟ انت أصلا عشان تخسر شي لازم تحصل عليه بالأول وانت وش أقول؟انت ما تقدر تخسر شي ما حصلت عليه من الأساس

**أما في المجلس عند فيض وسلطان كان الوضع شوي مختلف عن باقي الناس ..
سلطان:الحين بأفهم شي يا حبيبة سلطان..
فيض :وشو؟
سلطان بخبث:ليش جالسة بعيد؟
فيض شهقت: هذا الحين بعيد فرق بيني وبينك مسافة كرسي واحد ولا تبيني أجلس بحضنك؟
سلطان بخبث:لا يكون خايفة آكلك ترى من حلاك اليوم ممكن أسويها بس لا تخافين انا ماآكل بس.....بابتسامة:أعض!!
فيض :لا والله بتعضني يا سليطين أهون عليك تشوهني؟
سيليطان راح عندها ووقفهامن مكانها وخلاها تجلس بحضنه وضمها بيدينه:انا ما يهون علي أزعلك مني واشوهك جعل روحي تطلع ولاأزعلك مني أبد
فيض على انها مستحية بس قالت بدلع :عارفة اني ما أهون عليك والحين ممكن تتركني قبل ما يدخل أبوي ويشوفنا كذا
سلطان بلا مبالاة:واذا زوجتي حلالي اذا ما جلست بحضني تجلسين بحضن مين؟....وبخبث:وين بوستي؟
فيض خلاص تبغى تقوم :سلطان اتركني والله عيب
سلطان فتح عيونه عالأخير :عيب!!يا بنت أنا زوجك تعرفين وش يعني زوجك؟
فيض صارت تموت بكلمة زوجك مو قادرة تصدق ان سلطان خلاص زوجها
كمل كلامه:بعدين في أشياء بأسويها أولا بأعضك بس مو الحين
فيض:ليش؟
سلطان:ثانيا بأدور فيك الين ما تدوخين وبعديـ..
فيض قاطعته:سلطان اتركني والله انك مجنون
سلطان وقف وشالها بين يدينه :تمسكي زين
فيض مستغربة :ليه؟
وصار يدور فيها الين ما داخت نزلهابس هي تمسكت فيه بقوة وسلطان ضمها:ما خليتك تدوخين الا عشان أبغاك تتمسكين فيني كذا بس عشان أحس بشدة حاجتك لي ..ورفع راسها وباسها
ومرت عليهم دقيقتين وهم على نفس هالوضع بعدين سلطان:توعديني انك تتمسكين فيني كذا وعمرك ما تتركيني؟
فيض ابتسمت:أوعدك
بعد عنها سلطان وبرومانسية :أحبك
فيض:وأنا أموت فيك
سلطان طار من الفرحة :وش قلتي؟

**راحت فيض للبنات بعد ما طلعت من عند سلطان و زوجها الل تمووووت فيه راحت فيض لسمر وقمر وجلست جنبهم...
سمر:هلا والله بزوجة أخوي هلا
فيض استحت ...
قمر بخبث: الله أكبر لحظة تاريخية فيض تستحي البنت ما يهزها شعره بس من عرفت سيلطين <<تقلدها ....الخجل 24 ساعة على وجهها
فيض رفعت يدها تهدد قمر:وش قالوا لك فاصخة الحيا ...وسكتت لما لاحظت ان البنات يناظرونها ويبتسمون ونزلت يدها على طول ..
قمر:لا والله نزلت يدك يعني بزعمك بتخفين البلاوي و آثار الجريمة ..
سمر:يوم طلعت ما كان بيدك شي و يوم رجعت بلاوي يعني السبب.....
سمر وقمر :سلطـــــــــــــــــــان
سمر: يلا تكلمي وش صار عشان يعضك؟
فيض بخجل ورومانسية :تدرين أخوك مجنون يا سمر
سمر:أكيد مجنون مجنون فيك
فيض برومانسية :تدرين اني اموت فيه على هباله و جرائته الزايدة وشخصيته الغريبة ويوم قلت له اني أحبه وأموت فيه من فرحته المجنون قال لازم أعضك عـشان تذكريني كل مرة تشوفين فيها عضتي وربي يا سمر أخوك مجنون بس هو مجنوني أنا وراضية فيه وأبيه بكل عيوبه عاشقته عاشقته يا ناس هو حبيبي أنا حياتي أنا وهو روحي وقلبي وعمري وكل شي في دنيتي والله يهبل فديته....

**وفي مكان ثاني ...واحد قاعد بغرفته ويكلم نفسه :هذا اللي بغيتيه و تركتيني أنا ..أنا عشانه والله ماأخليك تتهنين فيه ولا يتهنى فيك بأحرمه منك مثل ما حرمتيني منك والله لأخلي دموعك على خدك طول عمرك وخطتي بأنفذها بس مو الحين بأنتظر الين ما تتعلقين فيه ووقتها بأخذه منك والله لو أروح فيها بسجن بس ما يهمني أهم شي أحرمك منه وأخليك تحسين باللي حسيت فيه ما عاد يهمني شي من بعد رفضك لي ما يهمني شي من بعد ما رديتيني أنا ..أنا يا فيض بيس والله لأوريك مين يوسف اللي استهنتي فيه..أكيد عرفتوه ما في غيره هذا يوسف
وش بتخبي الأيام لفيض؟ووش ناوي عليه يا يوسف؟

**انتهت الملكة وطلعت قمر عالساعة 2 الليل للسيارة عشان تروح ويوم ركبت السيارة..
ابراهيم<<سواقهم:ماما..ماما
قمر:خير وش فيك؟
ابراهيم:ماما خذي هذا جوالي مالي انتي
قمر استغربت ويوم فتحت شنطتها بالفعل طلع هذا جوالها وخذت الجوال وقالت:ابراهيم مين أعطي هذا انتا؟
ابراهيم:رجال في اجي هنا عندي انا بعدين في كلام أعطي هذا مدام
فتحت الجوال ولقت فيه رسالة من رقم غريب مكتوب فيها:
((الساعة خمسة الفجر بأتصل عليك ردي علي ضروري...لا تنسين))
تجاهلت الرسالة ووصلت بيتها ودخلت النت وبدلت ملابسها وقعدت ويوم جت الساعة خمسة الفجر رن جوالها نفس الرقم الغريب اللي أرسلت منه الرسالة احتارت ترد ولا لا وقالت أرد وأشوف السالفة ويوم ردت:الوو
المتصل:الوو ..انت قمر؟
قمر خافت مين هذا وكيف عرف اسمها بس ما حبت تبين خوفها:مين يبيها؟
المتصل:يعني هذا جوال قمر
قمر: ايه بس من يبيها؟
المتصل:سعود الـ...
قمر:معليش أخوي بس ماأعرف واحد اسمه سعود الـ..
سعود:يمكن تتذكرين يوم دخلت اليوم الملكة صدمت بواحد عند الباب وطاح منك جوالك وخذيته وعطيته سواقك
قمرابتسمت على تفكيرها ووين وصلها: شكرا أخوي ما قصرت بغيت شي ثاني؟
سعود:صراحة يوم الاثنين اللي هو بعد يومين اليوم الوطني مو؟
قمر :ايه واذا؟
سعود بوقاحة:بغيتك تطلعين معي
قمر بصراخ:وشو!!
سعود ببرود: والله يا قمر أبغى أعرف أطلع مع أصحابي بالتحلية نستعرض وحبيت نمرك تستعرضين معانا وش قلت؟
قمر عصبت من وقاحته وبروده:انت واحد وقح كيف تتجرأ و...
سعود يقاطعها:ما أنصحك بهالأسلوب يا حلوة لأن اذا ما جيتي بالطيب..وبصوت جدي:بتجين بالقوة لان اذا انت ناسية انت تحبين التصوير صح؟
قمر فهمت عليه:يا وقح يا حقـ....
سعود:وش قلنا يا حلو؟ بس عجبتيني يوم فهمت علي لان جوالك اللي مليان من صورك كلها صورك خذيتها والصور على جوالي الحين وعلى فكرة أنا شاطر بالتركيب فاذا كنت تبغين صورك تنتشر بالنت والبلوتوث وتروحين فيهاانت ما عندي مانع بس اذا بغيتي صورك تعالي وما يصير فالك الا طيب وش قلتي؟
قمر بانكسار:بأفكر بالموضوع وأرد لك خبر
سعود بفرحة:متى طيب؟
قمر:بكرة عالساعة 2 الليل وش قلت موافق؟
سعود:أكيد موافق غصب عني لأوافق أحد عنده القمر بيخاويه ويقول لا؟
قمر قاطعته باشمئزاز:ولو سمحت يا أخـ...ما تستاهل أقولك أخوي المهم احترم الفاظك الين ذاك الوقت فاهم ولا لا؟
سعود:ان شاء الله مع السلامة
قمر صكت بوجهه لانه بنظرها أنه أحقرمن ينقال له مع السلامة له ولا لأشكاله ..وهي تفكر وش ممكن تسوي؟وكيف بتصرف معاه؟ وتبكي على حالها وين وصل ؟ونامت بعد تفكير طويل....
(((نصيحة لحبيباتي الموقف صار من صدق لوحدة أعرفها بس الموقف هذا يعلمنا رجاء نستخدم الكاميرا بحذر ولا تفكرون مجرد تفكرين تصورين ولا عن طريق اللعب ترى اذا بعتي الجوال ناس خبراء يطلعونها حتى لو حذفتيها يعني استخدمي الجوال بحذر لسلامتك انت او غيرك)))

**أما سعود..وش قصته مع قمر ؟يمكن أعجبته؟يمكن حبها؟ "حبها"ولا ممكن يحبها لان أمثال سعود حرام عليهم يحبون طيب ليش اختار قمر بالذات ؟ يمكن لجمالها اللي يأسري اي واحد تتوقعون سعود انسحر بجمالها الطفولي مع ملامحها البدوية الأصيلة؟ طيب وش نهاية موضوعهم ومعقولة ممكن يجي واحد وينقذها مثل فارس لحظة ليش فارس بالذات ليش مو تركي
وشكراااا
هاذي القصه بالكامل
الرجوع الى أعلى الصفحة اذهب الى الأسفل
 
يوم انصدمت بدنيتي... دورتك جنبي مالقيتك...(الجزء السابع)
الرجوع الى أعلى الصفحة 
صفحة 1 من اصل 1
 مواضيع مماثلة
-

صلاحيات هذا المنتدى:لاتستطيع الرد على المواضيع في هذا المنتدى
™®© ملك النور ©®™  :: (©°™¤¦ شهـSpeCiaL CoRnEr ـد¦¤™°©) :: القصص والرويات( مختارة)-
انتقل الى: